همسة قبل السفر للعمرة، كتير من المصريين -خصوصًا كبار السنّ- لما بيروحوا حج أو عمرة بيتبهدلوا آخر بهدلة، وبيتوهوا عن الرحلة اللي هما طالعين معاها ومش بيعرفوا يرجعوا الفندق وممكن يضيع عليهم يوم أو يومين في الموضوع ده.
- فالأمر ده مسؤولية مين؟
ج- الأمر ده مسؤولية مشتركة بين أهل الحاج أو المعتمر من جهة وبين الشركة المُنظمة للرحلة من جهة أخرى، وأنا هأجل الكلام على مشرف الرحلة شوية لإن في حاجات لازم انت كإبن أو بنت تعملها قبل ما تقرر تسفَّر والدك أو والدتك حج أو عمرة، وهنخلي كلامنا عن كبار السن لإن المشكلة عندهم أكبر.
قبل ما تحجز لوالدك رحلة زيارة للسعودية لازم تكون عارف كذا حاجة:
١- هل والدك لديه قدرة على أداء المناسك بمفرده؟ يعني هل يقدر يطوف ٧ أشواط ويسعى ٧ أشواط لوحده ولا لازم حد معاه؟؟؟؟
٢- هل والدك أو والدتك يقدروا يروحوا كل يوم الفندق ذهابًا وإيابًا سيرًا على الأقدام ،إن كان الفندق ليس لديه أتوبيس كعامة الفنادق القريبة، أم لا يستطيع السير بمفرده ويحتاج إلى كرسي متحرك وشخص يساعده؟؟؟؟
٣- موضوع الطعام والشراب، هل والدك أو والدتك يقدر يوفر لنفسه كل يوم وجبتين طعام على الأقل من الأماكن المحيطة بالحرم؟ ولا معاه أكل يكفيه مدة الإقامة كلها ومش هنحتاج نشتري؟ ولا ندفع كم ألف زيادة في فندق يوفر فطار وعشاء بدل ما الأب والأم يتعبوا على مدار ١٥ يوم في الأمر ده؟؟؟؟
٤- هل والدك لو تاه أو فقد الطريق يقدر يتعامل ويتصل بالناس اللي معاه في الرحلة أو يوقف تاكس ويوريله كارد الفندق ويقدر يرجع بنفسه، ولا بمجرد ما يغيب عن الفوج في المناسك هياخد جنب ويظل حزينا ساعات أو أيام لغاية ما يرجع تاني؟!؟؟؟
باختصار شديد:
هل والدك أو والدتك محتاج مرافق معاه ولا يقدر يتعامل بنفسه؟! ولو محتاج مرافق، هل محتاج مرافق دائم على مدار الرحلة ولا في أجزاء محددة فقط زي الطواف والسعي أو الذهاب والإياب من الفندق إلخ؟
كل ده أسئلة لازم الإبن أو البنت ينتبهوا لها قبل ما يسلم جواز سفر أبيه أو أمه الطاعنين في السن إلى شركة سياحة ثم يشتكي إن الشركة سيئة والمشرفين مش بيعملوا حاجة وأبويا وأمي متبهدلين هناك.
مشرف الرحلة ليس سوبر مان، هيودي والدك ووالدتك الفندق ويرتب شنطهم ويطلعها الغرف وياخد والدك على كرسي متحرك يوميا للحرم ويأتي به نهاية اليوم، ويدفعه في الطواف والسعي ويشتري له الطعام إلخ، هذه أمور ليست منطقية.
انت اتفاقك مع الشركة هنا على إيه؟!
والله أنا عاوز مشرف يلازم والدي ٢٤ ساعة ويوديه ويجيبه من الحرم كل يوم ويفضل معاه في كل المناسك ويشتري له وجبات ويوديها له الغرفة ويخلي باله منه صحيا وكل شيء.
حقك تطلب اللي انت عاوزه، والشركة لها حق توافق أو ترفض وتقولك عذرا شوف شركة تانية أو يطلع معاه مرافق من عندكم أو هنضطر نزود السعر كذا ألف جنيه...، المهم يكون كل شيء واضح من البداية.
لكن للأسف في ناس بيسفروا أهلهم كبار السن وعاوزين المشرف يتولى أمرهم بنسبة ١٠٠٪ في كل شيء، وهذا في الحقيقة ليس من مهام الإشراف المتعارف عليها، المشرف يجمع الناس، ويضمن تسلهم للغرف على أكمل وجه، يشرح لهم المناسك واللي عاوز يؤديها مع المجموع يساعده ويطوف بيهم ويسعى، ويوفر للمعتمرين I.D أو أساور ويوزع عليهم كروت فندق ويؤكد على رقم تليفونه ويرد على الموبايل بسرعة أي وقت ويساعد أي حد يصاب بتعب مفاجئ ويسهل له إجراءات الرعاية الطبية ويهتم بجوازات ويخلي معاه نسخ احتياطية من التذاكر والتأشيرات ويكون حازم مع إدارات الفنادق ومقدمي الخدمات عشان يضمن حق الحاج أو المعتمر... كل دي واجبات ومهام من صميم عمله.
لكن أنا والدي في الفندق مش قادر يمشي كيلو للحرم (وكيلو دي مسافة قصيرة في ظل الأوضاع الحالية) وعاوز حد يوديه ويجيبه كل الصلوات، ومش لاقي حد يجيب له أكل، ومنها لله الشركة السيئة وربنا ينتقم منهم بياخدوا فلوس ع الفاضي إلخ.
كل ده كلام فوضوي وعشوائي، انت عارف إن والدك مش بيقدر يمشي يبقى تاخد له فندق على ساحة الحرم، عارف إن والدك مش بيقدر يوفر لنفسه طعام يبقى تتفق مع الشركة هنا على إحضار ٣٠ وجبة طعام على مدار ١٥ يوم للمعتمر، والدك مش بيعرف يؤدي المناسك يبقى عرَّف الشركة إنك محتاج كرسي متحرك وحد يدفعه، فهل المشرف هيعمل كده تطوعا أو بأجر أو هيخلص تأجير عامل خدمات من الحرم ولا مالوش دعوة؟!
ومتزعلش من حد في نفس الرحلة بيعتذر عن عدم العناية بوالدك أو والدتك، كتير من الناس بتبقى جاية لغرض معين وميقدرش يتولى مسؤولية حد كبير في السن لإن ده هيعطله ويضيع له نصف الوقت، آينعم أجر كبير وثواب، لكن في ناس بتستغل وقتها في أجور وثوابات وطاعات أخرى أتوا لها خصيصًا.
لازم تبقى عارف كل شيء وانت في مصر قبل ما تسفر والدك وتحضنه وتبوسه وتركبه الأتوبيس أو توصله للمطار وانت معندكش وعي بالصعوبات اللي بتقابل المعتمر هناك.
وأنا لا أقصد الشركات المهملة أو المشرفين المفرطين، ودول موجودين للأسف وكتير، لكن بتكلم على شركة محترمة عارفة اللي ليها واللي عليها، لكن لازم كل الأمور تكون واضحة من البداية، عشان تبقى انت ملم بكل الصعوبات اللي ممكن تقابل والدك أو والدتك وتحلها بدري بدري، الشركة هتقدم لوالدي إيه ومش هتقدم إيه.
وربنا يرزق كل المسلمين الحج والعمرة مرات ومرات، ويسهل لهم كل أمورهم، ويتقبل منهم، إنه على كل شيء قدير.